Xətai Bələdiyyəsi

Bələdiyyə xəbərləri 27-07-2026 1231

Xətai Rayon Bələdiyyəsi tərəfindən məhkəmə qərardadının icrası istiqamətində keçirilmiş təşkilati tədbirlər

Bakı Şəhəri Xətai Rayon Məhkəməsinin 12 mart 2026-cı il tarixli, e-2(5-94)-317/2026 nömrəli qərardadı ilə iddiaçı Əliyeva Arzu Canay qızının cavabdehlər "Park Azure" Mənzil-Tikinti Kooperativi və "Güvenli Servis Management" MMC-yə qarşı qaldırdığı mülki iş üzrə Xətai Rayon Bələdiyyəsi müstəqil tələb irəli sürməyən üçüncü şəxs qismində mülki işə cəlb edilmişdir.

Məhkəmə qərardadından irəli gələn vəzifələrin icrasının təmin edilməsi məqsədilə Xətai Rayon Bələdiyyəsinin sədri Elşad Vəliyevin tapşırığı ilə aidiyyəti əməkdaşlardan ibarət işçi komissiyası yaradılmışdır.

Komissiya tərəfindən ilkin təşkilati tədbirlər həyata keçirilərək "Park Azure" yaşayış kompleksində bina sakinlərinin bir qismi və binanın idarə edilməsini həyata keçirən "Güvenli Servis Management" MMC-nin nümayəndələri ilə işgüzar görüş keçirilmişdir. Görüş zamanı məhkəmə qərardadından irəli gələn məsələlər, qanunvericiliyin tələbləri çərçivəsində mümkün təhvil-təslim prosesinin ümumi prinsipləri, tərəflərin hüquq və vəzifələri barədə Xətai Rayon Bələdiyyəsinin İdarə Heyətinin üzvü, baş hüquqşünası Vüsalə Hüseynova tərəfindən ətraflı hüquqi izahat verilmiş, iştirakçıların sualları cavablandırılmışdır.

Daha sonra komissiya tərəfindən yaşayış kompleksinin ümumi istifadədə olan texniki sahələrinə, o cümlədən su nasoslarına baxış keçirilmiş, mövcud vəziyyətin sənədləşdirilməsi məqsədilə fotoqeydiyyat aparılmışdır. Baxış prosesi yalnız vizual müşahidə xarakteri daşımış, hər hansı əmlakın qəbul edilməsi, təhvil götürülməsi və ya hüquqi qiymətləndirilməsi həyata keçirilməmişdir.

Komissiyanın fəaliyyəti yalnız məhkəmə qərardadının icrası ilə bağlı təşkilati tədbirlərin həyata keçirilməsinə yönəlmişdir. Eyni zamanda, Azərbaycan Respublikasının qanunvericiliyinin tələblərinə uyğun olaraq kommersiya sirri təşkil edən məlumatların, tərəflərin daxili fəaliyyətinə aid məxfi məlumatların, habelə məhkəmə araşdırmasının gedişinə təsir göstərə biləcək məlumatların açıqlanmasına yol verilməmişdir.

Xətai Rayon Bələdiyyəsi bundan sonra da məhkəmə qərardadından irəli gələn hüquq və vəzifələrini Azərbaycan Respublikasının qanunvericiliyinə uyğun, obyektivlik, şəffaflıq, qanunun aliliyi və tərəfsizlik prinsipləri əsasında həyata keçirməyə davam edəcəkdir.

Oxşar Xəbərlər

2024-05-02 15:32:32

Şəhid Həsənov Ceyhun Aydın oğlunun xatirəsi əbədiləşdirildi: büstü qoyuldu.

1194

Bələdiyyə xəbərləri

Ətraflı

2024-04-20 14:52:54

Xətai rayonunda “Yaşıl Dünya naminə həmrəylik ili” çərçivəsində növbəti ağacəkmə aksiyası keçirilib

1653

Bələdiyyə xəbərləri

Ətraflı

2024-03-28 15:40:13

Elşad Vəliyev: “Ölkəmizdə “Bələdiyyə gününün “ təsis edilməsi bələdiyyə üzvlərinə və qulluqçularına həm də əlavə bir stimul vermiş olardı”

1678

Bələdiyyə xəbərləri

Ətraflı

2024-03-28 15:38:51

Elşad Vəliyev: “Şəhid və qazi ailələrinin sosial və məişət problemlərinin həlli Xətai bələdiyyəsinin diqqət mərkəzindədir”

1421

Bələdiyyə xəbərləri

Ətraflı

2024-03-28 15:37:27

Elşad Vəliyev: “ İnanırıq ki, “Yaşıl dünya naminə həmrəylik ili”nə hər bir bələdiyyə öz töhfəsini verəcək”

1621

Bələdiyyə xəbərləri

Ətraflı

2024-03-28 15:27:31

19.03.2024-cü ildə Xətai rayon Xətai bələdiyyəsinin nümayədələri Novruz bayramı ərəfəsində 3 saylı uşaq evində olublar.

1448

Bələdiyyə xəbərləri

Ətraflı

Bələdiyyə sədri

Vəliyev Elşad Vilayət oğlu

Xətai Rayonu Xətai Bələdiyyəsinin sədri

Vəliyev Elşad Vilayət oğlu 11 aprel 1978-ci ildə Naxçıvan Muxtar Respublikasının Ordubad rayonunun Xanağa kəndində anadan olmuşdur.

1995-ci ildə Naxçıvan Dövlət Universitetinin İqtisadiyyat fakültəsinə qəbul olmuş, 1999-cu ildə həmin ali təhsil müəssisəsini iqtisad ixtisası üzrə bitirmişdir. Təhsilini davam etdirərək 2003-cü ildə Azərbaycan Respublikasının Prezidenti yanında Dövlət İdarəçilik Akademiyasına qəbul olunmuş, 2006-cı ildə həmin akademiyanı müvəffəqiyyətlə başa vurmuşdur.

Əmək fəaliyyətinə 22 may 2001-ci il tarixində Yasamal Rayon Əhalinin Sosial Müdafiəsi Mərkəzində müfəttiş vəzifəsində başlamışdır. Peşəkar fəaliyyəti və məsuliyyətli xidməti nəzərə alınaraq 15 fevral 2002-ci il tarixində həmin qurumda baş müfəttiş vəzifəsinə təyin edilmişdir.

03 may 2007-ci il tarixindən etibarən Dövlət Sosial Müdafiə Fondunun Hərbi Qulluqçular və Xüsusi Dərəcəli Şəxslərlə İş Departamentində baş məsləhətçi vəzifəsində çalışmış, sosial müdafiə sahəsində dövlət siyasətinin həyata keçirilməsi istiqamətində mühüm fəaliyyət göstərmişdir.

01 may 2017-ci il tarixindən 12 sentyabr 2019-cu il tarixinədək Dövlət Sosial Müdafiə Fondunun Xətai rayon şöbəsində baş məsləhətçi vəzifəsində fəaliyyətini davam etdirmiş, vətəndaşlara göstərilən sosial xidmətlərin təşkili və idarə olunmasında yaxından iştirak etmişdir.

23 dekabr 2019-cu il tarixində keçirilmiş bələdiyyə seçkilərində Xətai Bələdiyyəsinin üzvü seçilmişdir. 15 yanvar 2020-ci il tarixində keçirilmiş bələdiyyə iclasının qərarı ilə Xətai Bələdiyyəsinin sədri vəzifəsinə seçilmişdir. 29 yanvar 2025-ci il tarixində keçirilmiş bələdiyyənin ilk iclasında yenidən Xətai Bələdiyyəsinin sədri seçilərək ikinci dəfə bu vəzifəyə etimad göstərilmişdir.

Sədr kimi fəaliyyəti dövründə Xətai rayonunda abadlıq və quruculuq işlərinin genişləndirilməsi, park və yaşıllıq sahələrinin salınması, məhəllələrin abadlaşdırılması, xidmətlərin təkmilləşdirilməsi, sosial layihələrin həyata keçirilməsi, şəhid ailələri, müharibə veteranları və aztəminatlı ailələrə dəstək göstərilməsi istiqamətində ardıcıl və məqsədyönlü fəaliyyət göstərmişdir. Onun rəhbərliyi ilə bələdiyyədə vətəndaş müraciətlərinə operativ baxılması, şəffaf idarəetmə prinsiplərinin tətbiqi və yerli özünüidarəetmə institutunun inkişafı istiqamətində mühüm işlər görülmüşdür.

Vəliyev Elşad Vilayət oğlu Yeni Azərbaycan Partiyasının üzvüdür. Rus və ingilis dillərini bilir.

Ailəlidir, bir övladı var.